.... خلاص سيباني🌿
الكاتبة_ الشاعرة أ. نجلاء علي حسن
🌿🌿🌿🌿🌿🌿🌿🌿🌿🌿
خلاص سيباني
(على لسان أبو العروسة)
********************
خلاص سيباني ورايحه معاه،
هاتسيبي دراعي وتمسكي فيه؟
راح تشكي له همك وأوجاعك،
وهيبقى اللي هتتسندي عليه؟
والله ما هيحبك أدي،
بس اوعي على خاطرك تاخدي،
من أبوكي اللي عاش علشانك،
وبإيده مظبط فستانك!
معقولة حلاوتك دي يا قمري؟
اليوم ده استنيته طول عمري،
وأهو جه.. طيب أنا زعلان ليه؟
لا مش زعلان.. بس ملخبط،
وغيابك عني بفكر فيه..
فرحان ودموعي سبقاني،
علشان عشت وشايف فرحك..
والفرحة مهياش سيعاني،
خُد بالك منها يا واد إنت،
هتاخدها مننا يا ابن الإيه؟
والله يا بنتي لو جرحك،
راح أخلي أمه تبكي عليه..
هيشوف أبوكي ضهرك سندك،
ولا حدش بقى هيسمّي عليه..
يا حبيبتي يا تحويشة عمري،
والله ما هيحبك أدي..
يا شبابي اللي في لحظة معدّي،
من أول سِنة خالعها لك،
لأبحاث الجامعة أراجعها لك،
لجهاز متنقي ليوم فرحك،
سامحيني لو دمعي ده جرحك،
دي دموع الفرحة يا نور عيني،
نوارة بيتنا اللي كبرتي،
وخلاص على بيتك هتروحي،
وده عش جديد فيه نورتي،
إزاي تسيبينا بسرعة كدا؟
وإزاي على فرقتنا قدرتي؟
"ده كلام وبقوله جوايا"
علشان أداري قلقي وغيرتي،
من واد أخدك كدا من حضني..
والله بحبه كأنه ابني،
وعشانه طول عمري أنا ببني،
شخصية جميلة ولايقة له،
والله ده أمه داعية له..
يا حبيبتي فرحت ليوم فرحك،
والفرحة مهياش سيعاني..
ودموعي من الفرحة يا نور عيني،
أصل عينيا كتير وجعاني..
ده الحلم اللي حلمته يوماتي،
من وقت ما شلتك في اللفة،
تبقي عروسة بفستان أبيض،
وأمشي وياكي في الزفة،
لابسة الفستان ويا الطرحة،
وبإيدي سلمتك لعريسك..
وتعيشي الحب مع الفرحة،
وخلاص أعلنا تدبيسك،
وكتبنا كتاب الننوسة،
من قلبي أنا بدعي لك دايمًا،
تفرحي يا حبيبتي وتتهني..
وأشوف أحفادي وأدلعهم،
والله هشيلهم في النني..
يا حبيبة عيني المحروسة،
ودعايا فوقيه مليون بوسة،
من أبوكي يا أحلى عروسة.
بقلم/ نجلاء علي حسن
الفراشة الزرقاء 🦋
تعليقات
إرسال تعليق