.... سجن الظروف🌿



 

 الكاتب_ الشاعر أ.عماد سيد

🌿🌿🌿🌿🌿🌿🌿🌿🌿

(( سجن الظروف ))


قتل المشاعر من زمان 

دفن الغرام 

معدوم ضمير 

خدني ورماني

 ف قعر بير 

والحبل مربوط

في إلإيدين 

مش للوصال

الحبل كان للمشنقة

حبسني جوة الشرنقة

والإسم كان حارس أمين

والفعل سجان مستكين

كرباج في إيد 

وإيد بتدعي ربنا

يهون عليه

 يرمي إللي فات من عمرنا

مكسور جناحي من زمان 

عصفور بريء 

مش عارف أطير

عايش أسير 

بين نار و مر 

دقت الألم م الأقربين

شفت الوجع عذاب وشر

جاني القدر 

خدني ورماني ف سكته

مظلوم ياقلبي بقسوته 

سقيته شهد 

وصنت عهد

والرد كان جحيم أنين

عمري الرخيص بيروح هدر

موصوف لي أعيش 

راضي بنصيب 

راضي بقدر 

مدبوح وبنزف بحر دم

شلت الهموم وشربت غم

القهرة لسة ف عهدتي 

الذل بيشد ف دراع 

والتاني مشدود بالخداع

وإللي إشترى زي إللي باع 

والحسرة تسبق حرقتي

ومخدتي مبلولة

 بدموع الضنا غرقانة هم 

ومرايتي شاهدة ع الزمن 

صرخت وكسرت نفسها

أشباح بتسكن ضلها

أيام بتسرق حسنها 

والشعر شاب تجاعيد 

خطوط بتداري قسوة

بضحكها 

حتى إللي باقي منها 

حبة حروف 

متغمسة أحزان وخوف

وسطور بتشكي م العفن 

على الرفوف

ورافضة تظهر ف العلن

خايفة الظروف

جلاد وقاضي راح حكم

سجان بيقفل ألف باب 

قمقم ضلام و أربع حيطان

ألوانها دابت من زمن

وخرم باقي ف شقها

ضيق وخارج حبل نور 

أوهام كأنه عمود بخور

لحظة إتحرق

سجاني رافض فسحتي

خانق هوا شال الدوا

قاتل مشاعري وبسمتي

والعمر عدى

 وقطر فات

صمت وسكات 

وصراخ ندم 

والشمس غابت والقمر 

حتى النجوم فوق السحاب 

رافضة نزول حبة مطر

تروي الأمل 

ونسيت كمان شكل الورود 

شكل الشموع

 شكل الفراشة 

والشجر 

مفيش خبر عن الحياة

هو السؤال 

الموت حضر  

ولا إللي باقي مختبر 

يفرض تجاربة والظنون

وأوصل معاه حد الجنون 


سجان وفارض سطوته 

مفيش خروج م المعتقل

والحكم إعدام للضمير

والحبل مكانش للوصال

الحبل كان للمشنقة 


سجن الظروف مرار وخوف


بقلم//

        عماد سيد

تعليقات

  1. شكرا رابطة الكتاب العرب على الفيسبوك
    وشكرا كل الكادر الاداري على مجهودكم الملحوظ

    شكرا التوثيق

    ردحذف

إرسال تعليق

المشاركات الشائعة من هذه المدونة

(((( أبت الحقارةُ أن تفارِقَ أهلها. ))))

يا من تراقبني بصمت

((((( قلت لأحلامي تعالي فتعالت. ))))