... الشمس الضاوية🌿

الكاتب  الشاعر أ. محمد جعيجع

🌿🌿🌿🌿🌿🌿🌿🌿🌿

الشمس الضاوية :

ـــــــــــــــــــــــــــــــ

شعر شعبي جزائري

ـــــــــــــــــــــــــــــــــ

. . . . . 01 . . . . .

اَلْحَمْدُ لِلهْ كُنْتْ عَايِشْ فِ نِعْمَه 

امْعِيشْتِي هَانْيَه مَا دَخْلِتْهَا ءَافَاتْ

وَاحْيَاتِي ضَاوِيَه مَا فِيهَا عَتْمَه 

أُمِّي هِيَ الشَّمْسِ اَلْلِي ضَوَّاتْ

. . . . . 02 . . . . .

أَنَا وَامِّي مَازْيَنْهَا لَمَّه 

فِ الدُّنْيَا مَاسْعَدْهَا سَاعَاتْ

كِلْمَة أُمِّي مَاحْلَاهَا كِلْمَه 

نَنْطَقْهَا نِسْمِعْهَا فِ هَذِي الحَيَاة

. . . . . 03 . . . . .

وِاليَوْمْ مِنْهَا اتْخَطْفِتْ لُمَّيْمَه 

اَخْطَفْهَا مِ احْيَاتِي هَادِمِ الْلَذَّاتْ

وَلَّاتْ اَمْعِيشْتِي اَحْيَاتِي ظَلْمَه 

اَلشَّمْسِ الْلِي ضَاوِيَه رَاحِتْ اتْمَسَّاتْ

. . . . . 04 . . . . .

غَسَّلْنَاهَا بِالكِتَّانْ اسْتَرْنَاهَا ثَمَّه 

بِالمَحْمَلْ هَزَّيْنَاهَا زِينَة الأُمَّهَاتْ

وَاعْلِيهَا صَلَّيْنَا رَبْعَه بِالهِمَّه 

اجْمِيعْ الحَاضْرِينْ أَدْعَاوِلْهَا بِالمَغْفِرَاتْ

. . . . . 05 . . . . .

سِكْنِتْ فِالحِينْ دَارِ الحَقْ بِالعَزْمَه 

افْرَاشْهَا اتْرَابْ وِالغِطَا حَجْرَاتْ

ثَبَّتْهَا يَا رَبِّي وَاعْطِيهَا بَسْمَه 

اتْجَاوِبْ عَ السُّؤَالْ بِ زِينْ الكَلْمَاتْ

ــــــــــــــــ

محمد جعيجع من الجزائر ـ 27 أكتوبر 2024م