تعالى يا ولدي
الشاعرة إلهام شعبان
تكتب
🌻🌻🌻🌻🌻🌻🌻
🌻🌻🌻🌻🌻🌻🌻
تعالى يا ولدي أحكيلك الحكاية من الأول
يمكن أساعدك وأطبطب وأهوّن
في الدنيا هتمشي مشوار طويل
هتقابل فيه الخسيس ويّا الأصيل
الكل في الفرح مِلوّن
لكن الشِدّة بس اللي بتبيّن
فيه اللي يحفظ عِشرتك
مهما بعدت المسافات
واللي يجرّح في سُمعِتك
مهما كان بينكم ذكريات
فيه اللي ينزّل دمعتك
واللي يبكي لفرحتك
وهتلاقي كمان إبن اللئيمة
اللي الفلوس عملتله قيمة
وهتلاقي كمان إبن الأصول
مهما شاف ظلم دايماً يصون
وفيه الفقير اللي عينه مليانة
أصل الشبع فيه وراثة ورِباية
وفيه الغني دايماً جعان مهما جمع
ده أصله فيه طبع الطمع
وتشوفه زي الكلب مسعور
لأجل المال بيبيع ويجور
من كل شيء فيه كذا شكل ولون
عمر الجدع ما كان باللبس ولا باللون
ولا تغتر بحلو الكلام
ولا تدي للناس أمان
ولو إتظلمت ما تعش دور الضحية
عُمر حِلمَك ما يتحقق من غير تضحية
والصاحب اللي بجد راجل و صالح
مش هيبان غير لما تتعارض المصالح
الحياة عبارة عن شوارع ومفارق
فيها اللي بقى وفيها اللي فارق
واللي مشى وكان لأحلامنا سارق
واللي بقى ولا عدش معانا فارق
الهام شعبان
🌻🌻🌻🌻🌻🌻🌻🌻🌻
تعليقات
إرسال تعليق