💎♦️حرف علة وحرف ساكن♦️💎
الأستاذ وحيد علي الجمال
يكتب
🌿🌿🌿🌿🌿🌿🌿🌿
🌲🌲🌲🌲🌲🌲🌲
(حرف علة وحرف ساكن)
فاكرة والا العمر عدى
واللي بينا نون وشَدَّة
حبنا مشدود بشِدِّة
الكسور مش مستحبة
كنت فاعل جاتله نكبة
راح عاملي ألف جلطة
جم شالوني جوه خضة
والطحين بقى نُصه ردة
فاكرة يعني لما تمشي
راح يحطوا جوه قلبي
نار وشطة؟!
اكدبي ميت ألف كدبة
واعملي م الحبة قبة
اللي بينا راح أونطة
واللي قبلي شال له شنطة
عدى بيها كام محطة
قلبي كان ماشي في غاغة
تقولشي كان رايح مغاغه
ولا كان هربان بجرحُه
الدموع كانت في طرحُه
شَد أستيكه ومحاها
نفسي مني أستخبى
وأنسى غدره حبة حبة
حظي مال ويا الأحبة
قلبي كان فرحان بقربه
كان يوماتي يجيب ف سيرته
البيوت كانت تحبه
لما يحكي عن حبيبته
فجأة غابت من حياته
والبعاد زلزل سكاته
حد يعرف ليه حبيبته
جت وسافرت مرة واحدة
م الدفاتر
اوعى تحلف.. خُد لي ساتر
اقرا تعويذة العساكر
أنت حامد ابن شاكر
والأماكن اللي بينا
هو ديما فيها راكن
شكل داكن فيه مشاكل
واللي مكتوب في القصيدة
بعد بَعْدُه وبعد منه
حرف علة وحرف ساكن
إمشى يالا قلبي ضامن
اوعى تاكل ف الأنامل
راح يكون البعد شامل
حق جرحك يبقى كامل
مهما تبعد..
لسه بينا كام علامة
هات لي قلبي
ويالا فارق بالسلامة
وحيد علي الجمال سرس الليان محافظة المنوفية جمهورية مصر العربية
🌲🌲🌲🌲🌲🌲🌲🌲🌲
تعليقات
إرسال تعليق