🌻⚘مسحراتي⚘🍀
الشاعر عبد الرحيم علي
يكتب
🍀🍀🍀🍀🍀🍀🍀🍀
🌻🌻🌻🌻🌻🌻🌻🌻
مسحراتي
________
مسحراتي باصحّي أُمّة
بحجم قارة
باصحي مصر
بصوت صعيدي م الروح يا سيدي
ولادها بارّة ،شلال بيجري فرح ومَسرّة
أسوان حبيبة،رجاله سمرا
وبيها هيبة تقولشي جمرة
مضايفه كل اللي جاي زاير
اهل الطيابه،اهل البشاير
وع القناوي حَوّد يا غاوي
علي اسمه اسمي وكنت ناوي
أزور مقامه واقيدله شمعه
رجاله حلوه زي الزانات
علي رأس بلدنا رافعين رايات
وسوهاج وجرجا قلب الصعايده
رجاله حاميه زي الاسوده
لو جيت عليهم يا ليله سودا
وأسأل عليهم حتلاقي فيهم
ناس عُلما دايما في العلم راية
وفي كل علم رافعين رايات
واسيوط رجوله قد المقوله
رجاله جامده تقول عموله
خدم لضيفهم وفي الشدايد
حاميين كأنك في فرن قايد
شي الله يا منيا دي حاجه تانيه
عروس بنيلها زينه برجالها
بندر منوّر ،جمال مصوّر
ولو تدور مفيش مثالها
وسويف دي جنه ترابها حِنّه
والجيزه ميزه وناس لذيذه
جامعة وفارده قلوع علامها
عاليه بناسها ،عاليه بمقامها
والعلم جوه الرجال غريزه
وكايرو أُمة والكل فيها
ازهر زاينها والله راعيها
غُرب وقرايب،اهل وحبايب
ودا اللي واخد،ودا اللي جايب
حسين وعتبه ،وفيها اوبرا
ايام جميلة ونهضة كبرا
فيها الصعايده والبحراويه
شي الله يا بدوي
ناس مِيّة مِيّة
واسكندريه حلوه وماريا
ع الشط هاتلي كرسي وتعالي
ناخد ونِدّي ،نشبع قواله
مفيش اونطه ولا فيه سحوره
الا وهيه حلوه وبهية
بهية دِىَ ام شال قطيفه
خدلك هديه حلوه وظريفه
خايف ل انسى اجدع سوايسه
وبور سعيدك والبمبوطيه
فنار ومينا ،بحر وسفينه
واجمل مدينة واكتر شِوَيّه
سحور وبركة يا مصراويه
عبد الرحيم علي
🌻🌻🌻🌻🌻🌻🌻🌻🌻
تعليقات
إرسال تعليق