((((( ياللا بينا. )))))
الشاعر / هلال البنا / يكتب
⭐⭐⭐
ياللا بينا
هلال البنا
ياللا نزرع ورد تاني
تبقى فيه ريحة العطور
والشجر يطلع أماني
يكبر ويطرح زهور
كانلي زرع وكان أناني
كان مزروع في أرض بور
فين حبيبي اللي نساني
سابني ليه وغاب دهور
ياحبيبي عودلي تاني
نملا كل الدنيا نور
وهات زماني الأولاني
ويا نور الحق يدور
ياللا نزرع تمر حنه
وأرضى ترجع تاني جنه
فيها خير ينفع عيالنا
ويبقى نور العدل جالنا
ياللا نكتب في الأغاني
شعر يطرح لحن نور
واللي كان كاني وماني
كله كدب وكله زور
مين ياناس يسمع كلامي
كله حب وكله خير
روح ياطير بلغ سلامي
للنبي بدر البدور
وعالنبي هانصلي تاني
ميت صلاه وتكون قليل
صلي ماتكونشي الأناني
صلي صلي عالجليل
ياللا نشرب ف القناني
ميه شهد وزنجبيل
ونحكي في أيام زماني
لما كان زمان جميل
نرجع نزرع ورد تاني
يكبر ويطرح عطور
أصل زرعي الأولاني
والشجر يطلع أماني
بالوافكه والزهور
والبلابل والأغاني
والعصافير والطيور
والورق أخضر روايح
والعيدان فيها البخور
والقمر يطلع يلالي
والنجوم حواليه تدور
لما شمس الحق تاني
تملا كل الدنيا نور
أصل زرعي الأولاني
كان مزروع في أرض بور
والأشواك معذباني
إمتا كل الشوك يغور
ونرجع نزرع شهد تاني
وأرضنا تطرح سرور
ياللا بينا
هلال البنا
تعليقات
إرسال تعليق