(( بتتنمر ليه ))

الشاعر/محمد عبدالغني عمارة

يكتبـــــ 

(( بتتنمر ليه ))

يا خسارة وألف خسارة ..

أشباح ماشيه في 

الشارع والحارة ..

ما خلاص الأب 

والأم في خبر كان ..

لا تربية ولا أصول زي زمان ..

الواد لسه في البيضه 

أنا مان أنا مان ..

يا خيبه عليك 

دا أبوك عايش كحيان ..

وعلى لقمة عيشه 

من المر طفحان ..

ومن شغلانه لشغلانه

عشانك حفيان ..

وأنت يا بيه 

شايف نفسك قال إيه ..

إبن بارم ديله 

ولا حد زييه ..

كفياك رخامه ع الخلق ..

وبألفاظ بذيئه 

عليهم تتريق ..

مش شطاره 

أبدا إنك تتنمر ..

وع الضعيف 

والغلبان تتأمر ..

وفي الآخر مسكين 

يروح في خبر كان ..

وأبوك ينعي حظه 

وعلى تربيتك ندمان ..

ويضيع عمرك 

بغلطة دنيئه ..

في زنزانه ومن 

ضيقه لضيقه ..

إياك فاكر إن الرجولة 

فتحة صدر ..

والشهامة بذاءه وفجر ..

أو صوتك العالي 

ع الناس بتسيطر ..

أو مطوه وسنجه 

عليهم تتمظهر ..

عيش براحتك 

كله سلف ودين ..

هتشرب من أسوأ 

كاس يا حزين ..

لكن دعوتي مش ليك 

لأنك فاقد تربيه ..

دعوتي لوالديك 

يفوقوا من خيبه قويه .

بقلمي // محمد عبدالغني عمارة _ 

الأربعاء 25 ديسمبر 2019 م .