سر السرور
الشاعرة/مريم الراشدي
تكتبــــ
سر السرور
هاك يا الحشمة
هاك يا الحيا
البنت ما تاهت
والراجل ما خلع اللحيا
هي تعلمت السماق والتاويل
وهو فهم المعنى وضبط التأويل
هي لالة العرايس،
من الكشينة حتى للبسة والتكحيلة
وهو سيد العرسان،
من الصنعة حتى لجابادور والشد والشاشية
هي منها الصّبَع كايطبع
وهو من الرضا وجهو كيلمع
فالخطبة ما خلاّ ما جاب
وكولشي دعا بالدعا المستجاب
هكذا كانت حكاية زمان تتروى
بلا هيام وبلا عشق ولكن كتسوى
كل تطليعة فالوجه بالصدق تقوى
والأواصر بالصبر والاحترام تتقوّى
جوعي فكرشي وعنايتي فراسي
ونعمرها بالتّبن وندوز عال العدو مصبّن
ما نرضى برضا ما ناكول طعام العرضة
هادو قيَم ضاعو والله يدير تاويل فالرضا
***************
السماق والتاويل : ترتيب الأشياء بذوق ودقة متناهية
الكشينة : المطبخ
اللبسة : اللباس التقليدي المغربي الرفيع للنساء
جابادور والشد والشاشية : ملابس تقليدية للرجال
الصبع : الأصبع / الصبع كايطبع : قمة في الأداء
ما نرضى برضى : نفسي عزيزة علي
ما ناكل طعام العرضة : كريم النفس، لايقبل بسرعة فائقة
مريم الراشدي
تعليقات
إرسال تعليق