*** سألت عليك ***
يوسف عبد الرضي الشيخ
*****
سألت عليك
سألت عنك
كل حاجه
حتي لمبات الشوارع
قالو شافوك وأنت راجع
شايل الهم
ما البفوتنا وما بوادع
تنكسر فيه الخواطر
وببقي زول مهزوم
وضايع
وتاني بسال
عن مكانك
الكلام البنيا شايع
قالو :
مالقيت زول يريدك
قالو :
مغرور وأنت فاكر
كل ريد بتجيبو ايدك
ونحن شايلنك حلم
كل لحظه بنشتهيك
كل سكه نشوفا نفرح
في انتظار ساعة مجيك
يا حلم طال انتظارو
يوم يكون البي بيك
وينكشف عنك حجابك
وتعرف اني الحاسي بيك
أبقي ارجع تلقى باقي
العمر ليك
وتلقي عندي الريده غيمه
تظللك وتخاف عليك
و سألت عليك :
سألت عليك
زهور الروض
ابت تفصح
قلنا تكون مع النجمات
أو مدسوس عطر
بين أجمل النسمات
وحات عينيك
من يوم داك منتظرين
نخلي الريده
ما عارفين نقبل وين
و كملنا الدروب توهان
في ناس في الريده
شحادين ؟
شلناك لوحه جوانا
نفتش ليكا في ألوانا
خطوط متشابكا حيرانا
نغني بقينا فنانين
نقول تسمع
وتتلطف تعود ترجع
ما صدقنا أنو الزول
بسبب للبريدو وجع
وما صدقنا باب الريده
بتصدع
وتتكسر سهام الحب
سيفو الماضيه ما بتفطع
تعال لملم رفاتنا و فوت
عشان جيتك قضينا سنين
بنتنفس هزمنا الموت
تعال ورينا كيف
الحب برد الروح
و قادر يكسر التابوت
ورينا كيف الحب
برد الروح
وقادر يكسر التابوت
يوسف عبدالرضي الشيخ
تعليقات
إرسال تعليق