وعادي برسم الضحكة
سامح بلال/يكتب.......
وعادي برسم الضحكة
وبعمل م الفسيخ شربات
وبتنطط وبتحول
لتاجر فرحه بعض ساعات
أضحك ده واغازل دي
واقلد بردوا شخصيات
واقول إيفيه بصوت سمعه
واقلد ضحكة ابو لمعه
وبعمل طفل ف حضانه
و أستاذ برودو ف الجامعه
وسعداوي بتاع الفول
وسيد ابن جارتنا
وعمك جرجس البقال
و مرزوق اللي ف حارتنا
وتيجي الناس من النصية
بسرعة لحد باب بيتنا
تشوف الفن والتقليد
ومين ابو وش متلون
بيمسح دمع كل الناس
و يمحي الحزن ويهون
وفجأة الدنيا دي تفضي
ودمعي ف عيني بينقط
وأفشاتي اللي كات ضحكة
وماليا الكون بقت أوراق بتتسقط
أفرح ناس وأداوي ف ناس
وعند حكايتي متلخبط
كأني ف عمر غير العمر
وجوة همومي متحنط
وعادي برسم الضحكة
وبعمل م الفسيخ شربات
لكن احساسي من جوة
بقى مفقود ومكتوب
اسمي ف الأموات
#سامح_بلال
تعليقات
إرسال تعليق